JKaL Community Forum

A Schwob wird erschd mit vierzig gescheid,
an andrer ed en Ewigkeit.
A jeder hoffd, des Versle schdemmd,
dass oims no do des Brett weg nemmd,
mo manche vor de Auga hend,
ond vorem Hirn, s ischd grad so mend.

Ma moind, dass no an Schnaggler duad,
an Schugglar dät es grad so guad,
ma horchd ganz gschbannd so en sich nai,
ond iberlegt sich bei ma Wai,
wie schee des wär, wenn ma ganz gscheid,
no gscheider wiea de andre Leid,
em Schwätza, Denka, Handla wär,
no dät ma sich hald ed so schwer.

Mit ällem, was mer macha miessd,
mer äwwl ällas besser wiessd.
No dät merns zeiga, däene Boss,
ond säss no selber auf em Ross,
dät schempfa, schreia, delegiera,
koin Fenger dät mer no mai riehra.

Mr hedd fuer ällas saene Leid,
obs des für ons wohl ao mol geid?
Aber was solls, s ischd bloss an Traum,
weil endra duad sich des wohl kaum.
Dr oinzich Goischd, mo en oin fehrd,
der kommt vom Wai, ond en sich herd
mr a Schdemm, i ischd ed zom Juchzga:
Menschenskind, du gohschd uff Fuffzga!